Feelings

બે દુલ્હનોની વચ્ચે અટવાયા વરરાજા…!

webmaster — Sat, 18 May 2013 09:40:10 +0000

લગ્ન કોઈપણ વ્યક્તિ માટે તેના જીવનનો સૌથી મહત્ત્વપૂર્ણ પ્રસંગ હોય એ સ્વાભાવિક છે. શાનદાર રીતે લગ્ન ઉજવાય તે માટે આપણે કેટલું પ્લાનિંગ કરતાં હોય છે પણ કુદરતના પ્લાનિંગ આગળ માનવીની શી વિસાત..! હમણાં જ આવો એક કિસ્સો ઉત્તરપ્રદેશના શાહગંજમાં થઈ ગયો. વાત એમ હતી કે સંજીવ યાદવ નામના એક વ્યક્તિની જાન લગ્નના માંડવે પહોંચી હતી. જમણવાર અને બીજી વિધી પૂરી થયા બાદ રાત્રે એક વાગ્યે હસ્તમેળાપ્નું મુર્હુત હતું. બધા ચોરીમાં આજુબાજુ ગોઠવાઈ ગયા હતા ત્યાંજ ફિલ્મીસ્ટાઈલમાં ધડાકો થયો. ના..ના.. દુલ્હન ભાગી ન્હોતી ગઈ પણ તેણે આ લગ્ન કરવાનો જ ઈન્કાર કરી દીધો. લગ્નમંડપમાં થોડી વાર તો સન્નાટો પ્રસરી ગયો. લગ્નની વેળાએ જ દુલ્હને ના પાડતા વરરાજા, તેનો પરિવાર અને સગાં-સંબંધી તો અચરજમાં પડી ગયાં કે આ યુવતી શું કહી રહી છે. વરના પિતાએ, સમાજના વડીલોએ અને સગાં-સંબંધીઓએ પણ તેને બહુ સમજાવી પણ એ યુવતી ટસની મસ ના થઈ. એટલું જ નહીં પણ એ યુવતી પર પંચાયતે દબાણ નાંખતા તે અને તેની મા બંને ઘર છોડીને જતા રહ્યાં. આ બાજુ વર અને તેના પિતા માટે તો સમાજમાં આબરુ જાય અને લોકો તેમના પર હસે તેવી સ્થિતિનું નિર્માણ થઈ ગયું હતું.
આખરે, વરરાજાના પરિવારે તે વસ્તીમાંથી જ એક યુવતી શોધી કાઢી અને તેની સાથે કોઈપણ પ્રકારના દહેજ વગર ઘડિયા લગ્ન લેવાનું નક્કી કર્યું. જોકે, સ્ટોરીમાં ખરો ટવીસ્ટ હવે આવે છે. બીજી યુવતી મંગળફેરા ફરવાની તૈયારી કરે છે ત્યાં જ પહેલી દુલ્હન આવી પહોંચે છે અને ફિલ્મી પ્લોટની જેમ જ `યે શાદી નહીં હો શકતી’ નો ફેમસ ડાયલોગ ફટકારે છે. ફરી એકવાર બધા સૂન્ન થઈ જાય છે. હવે પહેલી યુવતી કહે છે આ યુવક સાથે મારા લગ્ન નક્કી થયા છે એટલે હું જ તેની સાથે મંગળ ફેરા ફરીશ. જ્યારે બીજી યુવતી અને તેના પરિવારજનો પણ વિરોધ પર ઉતરી આવ્યા કે તું લગ્નમંડપ છોડીને જતી રહી અને હવે આ યુવક સાથે અમારી દીકરીના જ લગ્ન થશે. આમ, હવે એક જ યુવક સાથે લગ્ન કરવા બે યુવતીઓ માંડવે હતી અને કોઈ ઢીલ છોડવા તૈયાર ન હતું. આખરે પોલીસની મદદ લેવામાં આવી. બંને દુલ્હનો અને તેમનો પરિવાર પોલીસ સ્ટેશનમાં પોતપોતાની વિતકકથા સંભળાવી રહ્યો હતો. પહેલી યુવતીએ તેની સાથે લગ્ન ન કરવા બદલ જેલ કરાવવાની ધમકી આપતાં આખરે બીજી યુવતીએ મને-કમને પણ સમજીને લગ્ન કરવાની ના પાડી અને જેમતેમ મામલો થાળે પડ્યો. આ દરમિયાન વરરાજાને 15 કલાક સુધી ભૂખ્યા રહેવું પડ્યું હતું…! આપણે ત્યાં હાલ લગ્નની સિઝન ચાલી રહી છે ત્યારે આ કથા સાંભળી રહેજો વર-કન્યા સાવધાન !

વિજેતા નવાઝ ભારત માટે `શરીફ’ રહેશે ખરા?

webmaster — Sat, 18 May 2013 09:33:18 +0000

ગુજરાત સહિત ભારતમાં કાળઝાળ ગરમી 43 ડિગ્રીનો આંક વટાવી તેનું આક્રમક સ્વરૂપ બતાવી રહી છે. તો આપણા પાડોશી દેશ પાકિસ્તાનમાં પણ ઉનાળો ધખી રહ્યો છે, જેમાં રાજકીય ગરમાવો ઉમેરાતાં તે વધુ તેજ બન્યો છે. 1999ના બળવામાં સત્તા પરથી ફગાવી દેવાયેલ નવાઝ શરીફ હવે ત્રીજી વખત પાકિસ્તાનની રાજધૂરા સંભાળવા જઇ રહ્યા છે, ત્યારે પ્રશ્ર્ન એ થાય છે કે આ નવાઝ શરીફ ભારત માટે સાચા અર્થમાં `શરીફ’ બનશે ખરા?.. જોકે મોટા ઉપાડે તેમણે કહી તો દીધું જ કે, `અમે ભારત-પાકિસ્તાનનાં સંબંધો મજબૂત થાય તેવા પ્રયાસો જરૂર કરીશું.’ નવાઝ ભલે `શરીફ’ તરીકે ઓળખાતા હોય પણ આજસુધી તેઓ ભારત માટે ક્યારેય સજ્જન સાબિત થયા નથી. છતાં ભારતની સંસ્કારિતા તો જુઓ, હજુ પાકિસ્તાનમાં ચૂંટણીના પૂરા પરિણામ પણ આવ્યા ન હતા ત્યાં તો આપણા માનનીય અને અતિ ઉત્સાહી વડાપ્રધાન મનમોહનસિંઘે નવાઝને અભિનંદન આપીને ભારત આવવા આમંત્રણ પણ આપી દીધું! એકબાજુ ભારતમાં હાહાકાર મચાવનાર ગુનાખોરો, ત્રાસવાદી સંસ્થાઓ પાકિસ્તાનમાં ખુલ્લેઆમ ફરે છે, જે માટે ભારતે આંતરરાષ્ટ્રીય સ્તરે વિરોધ પણ ઉઠાવ્યો છે, ત્યારે તેની સામે પાકિસ્તાન માત્ર અટ્ટહાસ્ય કરી રહ્યું છે. આ સંજોગોમાં મનમોહન નવાઝને ભારતમાં આવવા આમંત્રણ આપે તે કેટલે અંશે વાજબી ગણાય? આ આપણી સાલસતા ગણાય કે મૂર્ખતા? સમજમાં નથી આવતું કે દોસ્તીનો હાથ લંબાવવાની ગરજ શું માત્ર ભારતને જ છે?
ખેર, હાલ એવોર્ડ આપવાની પરંપરા મોટાપાયે જોવા મળે છે. તાજેતરમાં જ બોલિવૂડના જાણીતા કલાકાર પ્રાણ સાહેબને 93 વર્ષની ઉંમરે અતિ સન્માનનીય ગણાતો દાદાસાહેબ ફાળકે એવોર્ડ અપાયો. કોઈપણ કલાકારને તેની હયાતીમાં અને ટોચ પર હોય ત્યારે તેનું સન્માન થાય તો એ વધુ આનંદદાયક હોય છે પણ કલાકાર તેની જિંદગીના અંતિમ પડાવ પર હોય, એવોર્ડ લેવા જવાની સ્થિતિમાં પણ ના હોય, કોઇ લાગણી કે ભાવ પણ પ્રગટ ન કરી શકે ત્યારે અથવા મરણોત્તર એવોર્ડ આપીને સન્માન કરવું એ તેની કલા-સેવા-સાધના પ્રત્યે સમાજ તરફથી નાઈન્સાફી છે. સમયોચિત સન્માનનો જ ખરો અર્થ છે.